Big movement don happen for di top of Nigeria Police Force.
President Bola Tinubu don accept di resignation of Inspector-General of Police, Kayode Egbetokun, and e don quickly appoint Assistant Inspector-General of Police, Tunji Disu, to take over as Acting Inspector-General of Police with immediate effect.
Bayo Onanuga, di Special Adviser to di President on Information and Strategy, drop dis update on Tuesday.
Why Egbetokun Comot
Egbetokun, wey President Tinubu appoint as IGP for June 2023, submit im resignation letter citing pressing family considerations as di reason wey push am to step down.
Im tenure wey suppos to run enta June 2027, in line with di amended provisions of di Police Act.
But di family mata wey e no go into detail about make am decide say e don do.
President Tinubu receive di resignation and express deep appreciation for wetin Egbetokun do for Nigeria.
Di President praise im years of beta service for Nigeria Police Force, im professionalism, im dedication, and im steadfast commitment to strengthening di internal security architecture of di kontri during im time for office.
Who Be Tunji Disu?
Di man wey don step into di big shoe na AIG Tunji Disu
Dis na oga police officer wey get plenty operational experience and wey don demonstrate strong leadership capacity throughout im career for di Nigeria Police Force.
President Tinubu say e get full confidence say Disu go provide di steady and focused direction wey di force need right now, especially with di security challenges wey di kontri dey face at dis moment.
Disu imself no be stranger to high-pressure policing.
Before dis appointment, e don serve in significant operational roles wey prepare am well for di responsibility wey don now land on im shoulders.
Those wey know am inside di force describe am as focused, experienced, and someone wey understand wetin ground-level policing work.
Wetin go follow?
Di appointment of Disu as Acting IGP na just di first step.
In compliance with di provisions of di Police Act 2020, President Tinubu go soon convene a meeting of di Nigeria Police Council to formally consider di appointment of AIG Disu as substantive Inspector-General of Police. After dat process don complete, im name go then go to di Senate for confirmation.
Until dat confirmation happen, Disu go dey run di affairs of di Nigeria Police Force in acting capacity — and from everything wey di Presidency don signal, dem dey expect am to hit di ground running without any delay.
About the Author
